• Inizio
• Cuentos

Cómo naixió Chuanet, l'onso sin miedo

Güe d'onsos no'n queda guaires, pero antes más, en os Pirineus, en a larga cadena montañosa que esnabesa dende o mar Cantabrico dica o mar Mediterranio, i bibiban arrienda d'onsos. Tamién bibiban en estas montañas pastors, picadors, carboners, cazataires... Os onsos se tresladaban d'una bal ta un atra, un día yeran en o País Basco y un atro en Bearn, de Cataluña pasaban ta Aragón... En os suyos biaches, no yera raro que bel onso se ranzoniase u se tresbatise.

Un onso se quedó isolau en una cueba, no guaire leixos d'una cabana de pastors. Pasoron semanas sin espazar-se a boira, y no podeba arrisgar-se a cayer por bel espaldadero. Yera triste y no enduraba pas a manca de compañía. Un maitino beyó que d'a cabana de pastors en saliba una muller a plegar leña.

L'onso la raptó y se la lebó ta la cueba. Y metió un cantalaz zaboyando a entrada.

Dimpuesas de nueu meses naixió un ninón.

Cuan o ninón fazió cuatro años, le dizió a su mai:

—Mama, ¿no quiers beyer o mundo?

A mai le siñaló o cantal. Y o nino estiró d'el con a suya man cucha y dixó patalera a entrada d'a espelunga. Teneba cuatro años, pero yera un onso asabelo fuerte.

—Nino, si bien tu pai y bei o que has feito, nos matará.

Pero l'onso chiquinín la lebó t'o lugar más zercano.

Y Chuanet, asinas se clamaba l'onso, fue t'a escuela.

Y toz os ninos se rediban d'él:

—¡Tu pai ye un onso! ¡Tu pai ye un onso!

Chuanet en agafó a uno por os dos piez, y emplegando-lo como tocho, fotió un buen batán a os suyos compañers.

Y le dizió a su mai:

—Mama, me'n boi a conoixer o mundo.

—Nino, ¿pero qué se t'ha perdiu en o mundo?

—Quiero conoixer o miedo —respondió Chuanet.

A muller consultó con o mayestro, y o mayestro le dizió:

—Yo l'amostraré o miedo.

Lebó a Chuanet ta un pallero an que o mayestro alzaba una gran caixa.

—¡Ubre a caixa! —l'ordenó a Chuanet.

Chuanet obedeixió: en ubrir-la, un puyal de palomas surtioron d'o suyo interior, sobatendo as alas en a cara d'o mesache.

A berdat ye que Chuanet se'n sorprendió una mica.

—¿No t'ha feito miedo? —le preguntó o mayestro.

—M'ha espantau una mica, pero no he sentiu garra miedo.

Y Chuanet dixó a o mayestro, dixó a escuela, dixó a su mai y se'n fue a mirar o miedo.