• Inizio
• Cuentos

Chuanet l'onso sale ta o mundo con a suya gayata

Chuanet l'onso quereba conoixer o miedo. Yera perén tricolotiando-se con os suyos compañers d'escuela, y denguno no l'estomagaba.

«¡Quiero conoixer o miedo!» le deziba a su mai, y a o mayestro tamién le deziba «¡Quiero conoixer o miedo!»

Y un buen día, beyendo que Chuanet no eba naixiu t'os libros, o mayestro le dizió:

—Tiene esta gayata, Chuanet. Te fará onra ta caminar por o mundo.

Yera una buena gayata, una gayata feita con una bara gruesa de cardonera.

Pero Chuanet la trencó como si fuese una rameta.

—Yo menesto una gayata de fierro.

Y o mayestro le demandó a o ferrero que le fese una gayata de fierro.

Cuan o mayestro le fazió o presén d'a gayata de fierro, Chuanet la trencó como si fuese una rameta.

—¡Esta gayata tampoco no bale ta caminar por o mundo!

Y en beyer ixo, o mayestro le dizió:

—Bes tu mesmo an que o ferrero, pedi-le que te faga a gayata que te cuaque más, que yo la pagaré.

Chuanet fue t'a fragua d'o ferrero, y se metió a replegar os rullos de fierro que i eba por tierra. Fazió una montaña de ferralla y le demandó a o ferrero que la fundise.

Y asinas tenió Chuanet a gayata que quereba, una gayata de fierro de zien quintals de peso.

Se despidó de su mai, se despidió d'o mayestro, se despidió d'o ferrero.

Y os suyos compañers d'escuela, en beyer que s'alueñaba, pretoron a cantar:

—¡Tu pai ye un onso! ¡Tu pai ye un onso!

Chuanet s'entró en a selba. Astí beyó a un picador que yera picando un fayo.

—¿Ta qué quiers ixe árbol?

—Mi mai m'ha demandau que le lebe una mica de leña —le respondió o picador. Y cuan dió o zaguer estralazo, dixó que l'árbol cayese sobre o suyo güembro, y se lo lebó ta casa.

Chuanet se quedó muito sorprendiu con ixe ombre.

Y pensó:

«¡O mundo ye pleno de chen como yo!»

Y dimpués de dixar l'árbol en casa d'a mai d'o picador, Chuanet y o suyo nuebo amigo marchoron a recorrer o mundo.