El ratet tresformau en ninona
En l'antiga India de las cuatro castas, un brahmán, ye dezir, un noble de la casta prenzipal, s'apasiaba en bella ocasión arredol d'una fuen, y ba biyer cayer ta's suyos piez un ratet desprendiu de'l pipón d'un cuerbo.
El ba pillar y se'l ba portar ta casa suya; l'afalagó y el ba curar tan bien que el ratet se ba combirtir en una ninona. El brahmán se'n ba fer muito contento, pos no teneba deszendenzia y de cutio eba quiesto tener una filla.
La ninona ba creixer.
El brahmán le preguntó cuan trigaría un amigo. El brahmán quereba tener un nieto.
La suya filla le dizió que buscaba a'l ser más fuerte de la naturaleza.
—Alabez, el que tu quiers ye el sol —ba responder el Brahmán.
Y a l'atro'l diya le dizió a'l Sol:
—La mía filla deseya un esposo que sía imbenzible, ¿la quiers per esposa?
Pero el Sol le ba responder:
—La boira destrui la mía fuerza.
El brahmán fayó la mesma pregunta a la boira.
—L'aire me fa ir t'an que millor le pareix —respondió la boira.
El brahmán le demandó a l'aire que se casase con la suya filla.
—La mía fuerza no puede con las montañas —ba responder l'aire.
El brahmán le demandó a la montaña que se casase con la suya filla.
—El ratet ye más fuerte que no yo, me forada a todas caras y se fica en las mías coradas —ba responder la montaña.
El brahmán le demandó a'l ratet que se casase con la suya filla.
Y el ratet le ba dezir que feba muito que buscaba nobia, y ba azeptar.
El brahmán preguntó a la suya filla si quereba casar-se con el ratet y ella respondió.
—Sí quiero, porque el ratet benze a'l mon, que benze a l'aire, que benze a la boira, que benze a'l sol.
Y el brahmán pensó:
«Ta plegare a esta fin, ¿ta que fayé yo que el ratet se tresformase en ninona?»
Y dende alabez s'adedicó a estudiare cómo podría conseguire que la suya filla se tresformase en ratet, ta que fuese goyosa con el ratet que benze a'l mon, que benze a l'aire, que benze a la boira, que benze a'l sol.
Testo: Koldo Izagirre
Traduccion: Dabi Lahiguera
Voz: Dabi Lahiguera
