Chuanet l'onso y o castiello d'as dolors
Chuanet salió a conoixer o miedo y se fazió amigo d'un picador.
Chuanet y o suyo amigo caminoron y caminoron, y a la fin se troboron con un ombre que yera a la puerta d'un molín. L'ombre teneba un ruello en o suyo dido, como un aniello, y se entreteneba fendo-lo chirar.
Beyendo ixo, Chuanet y o suyo amigo o picador se dizioron:
«¡O mundo ye pleno de chen como nusatros!»
—¿T'an iz? —les preguntó o molinero.
—¡A conoixer o miedo! —le respondioron.
—A yo tamién me faría goyo de conoixer-lo —dizió o molinero.
—¡Biene con nusatros! —le dizioron.
Y t'allá marchoron os tres a conoixer o miedo d'o mundo.
Plegoron en un castiello. No i eba denguno, pero en a cozina i eba minchar a embute.
Tamién i eba armas.
Se chugoron a palleta qui s'encargaría de cozinar, mientres os atros dos saliban a cazar.
Le tocó en suerte a o picador.
O picador se i quedó a parar a chenta, y Chuanet y o molinero se'n fuoron de cazera.
A o poco rato apareixió un anziano a la puerta d'o Castiello. Beniba bestiu con trafallons, y demandó de minchar.
O picador le dizió que teneba muito treballo, que no le podeba dar cosa.
Allora o biello mendigo le dió una gran toñina a o picador y lo dixó en o leito, endolorau de tot.
Cuan plegoron Chuanet y o molinero, o picador les dizió:
—Me fa mal tot lo cuerpo.
—¿Qué t'ha pasau, pues? —le preguntoron.
—Me fa mal tot o cuerpo.
—No t'apures, yo prepararé a chenta —dizió Chuanet l'onso.
Chuanet preparó a chenta y minchoron os tres. Y o picador se curó.
A l'atro'l día trioron a bombet qui se quedaría cozinando mientres os atros dos iban a cazar.
Y le tocó de quedar-se a o molinero.
Cuan pasoron un ratet cazando, o picador le dizió a Chuanet:
—Imos t'o castiello.
Cuan i plegoron, o molinero yera en o leito.
—Me fa mal tot o cuerpo.
—¿Qué t'ha pasau, pues? —le preguntoron.
—Me fa mal tot o cuerpo.
A l'atro'l día estió Chuanet qui se quedó cozinando. Cozinando y pensando, porque yera platero que astí pasaba cualcosa rara.
Pensaba y pensaba cómo benzer a las dolors.
Testo: Koldo Izagirre
Traduccion: Dabi Lahiguera
Voz: Dabi Lahiguera
