Lo vielh, los ausèths e los peishs
Un còp èra un vielh indian cherokee ; de tan vielh qui èra, ne podè pas ni caçar, ni pescar.
A còps, que demorava solet, per'mor la tribú qu'anava caçar, pescar o guerrejar, lavetz que pativa la hami.
Que's pensava de que s'anava morir. Tà minjar, qu'avè sonque produits deu son casalòt.
Qu'èra tròp aflaquit tà devarar dinc a l'arriu, e n'avè pas pro de fòrça enta téner l'arc.
Mes, ua nueit, dens lo son saunei, que vedó arribar, dinc au son tipi, lo petit monde, los enviats de Manitu.
Que l'ensenhèn quin calè har ua sarbatana, que l'ensenhèn a har hissons, a caçar ausèths.
L'endematin, qu'avè ua sarbatana e hissons dens lo son tipi.
Que s'i hasó tota la matiada a tirar hissons dab la sarbatana.
Quan sentí que tirava pro plan, que s'apressè d'un petit milhocar.
Que demorè, que demorè..
Ausèths que viengón minjar grans e lo vielh cherokee que tirè dab la sarbatana.
Que tornè tau tipi dab un sarròt d'ausèths. Que'us se plumè, que'us se hasó còser e que se'n hasó ua bona resèrva.
Atau, que podó minjar legumes e carn.
Quan e's sentí mei plan, que baishè tà l'arriu dab la soa sarbatana e que tornè tau tipi dab un sarròt de peishs.
Que'us se lavè, que'us se hasó còser tà aver ua bona resèrva de peishs.
Lo vielh cherokee qu'èra urós.
Quan cosinava, las aulors que s'estenèn pertot ad arron.
Un dia, atirat per aqueras aulors de cosina, un òmi qu'arribè.
Que'u demandè de qué minjar. Lo vielh que'u convidè dens lo son tipi, e aquiu, l'òmi que podó véder un sarròt d'ausèths e de peishs cueits.
Que's pensè qu'aqueth vielh ne s'ac podè pas minjar tot, e qu'èra mei normau que s'ac mingèsse eth.
E, en créder de qu'avè rason, l'òmi que tuè lo vielh.
Puish, que s'aprestè a minjar los ausèths e los peishs.
Mes cada còp qui volè dar un nhac dens un ausèth, aqueste que's tornava trobar las plumas, que hasè anar las alas, e, en volar, que s'escapava de la man de l'òmi.
E cada còp qui volè nhacar un peish, aqueste que's tornava trobar las escatas, que hasè anar la coda, que s'escapava de la man de l'òmi e que s'eslissava dinc a l'arriu.
E atau, l'òmi qui avè tuat lo vielh qui caçava ausèths e qui pescava peishs que's morí de hami.
Tèste : Koldo Izagirre
Trabucada : Institut Occitan (Pòle Lenga & Societat)
Votz : David Bordes
