• Inizio
• Cuentos

El biello y es paixaros y es peixes

Bi eba una bez un anziano indio cheroki, tan anziano que no teneba fuerzas ta cazar ni pescar. Bel.las bezes se quedaba solo, perque la tribu saliba a cazar, a pescar u a fer la guerra, e pasaba muta fambre.

Se pensaba que iba a morir. Només podeba alimentar-se de la bidolla de'l suyo chiquet ortal. Yera demasiato feble ta baixar enta'l río, e no teneba fuerzas ta tensar l'arco.

Pero una nuet, en suenios, plegoren dica'l suyo tipi es nemos, es imbiatos de manitú.

L'amostreron cómo fer una zerbatana, l'amostreron a fer dardos, y l'amostreron a cazar paixaros.

A l'altro maitín teneba una zerbatana n'o suyo tipi, con os suyos dardos.

Fue prebando tot el maitín, disparando dardos con a zerbatana. Cuando pensó que ya eba aprendito a disparar bien, s'azercó ta un chiquet panizal.

Aguardó e aguardó.

Plegueron es paixaros a minchar el grano, e l'anziano cheroki disparó la suya zerbatana. Tornó ta'l tipi con mutos paixaros. Es desplumó, es rustió e es guardó ta tener-ne una buena reserba.

Asinas podió minchar berdura e carne.

Cuando se sintió més fuerte, baixó ta'l río con a suya zerbatana e tornó ta'l tipi con buena cosa de pescato. El limpió, el rustió e el guardó ta tener-ne una buena reserba.

El biello cheroki yera goyoso.

Cuando rustiba, estendeba una oloreta agradable per la redolada. Un día, atraito per la olor de'l rustiu, se l'azercó un ombre. Le pidió de minchar. L'anziano el combidó ta'l suyo tipi, e astí el bisitán podió biyer buen amiro de paixaros e de pescatos rustitos. Pensó que ixe anziano no podría minchar-ne tanto, e dezidió que yera chusto que se'l minchase el.

E pensando que teneba razón, l'ombre mató a l'anziano.

Dimpués se paró ta minchar es paixaros e pescatos.

Pero cada begada que se lebaba un paixaro ta la boca, el paixaro recuperaba las suyas plumas, sobateba las alas, eslampaba de la man de l'ombre y feba bolito.

E cada bez que se lebaba un peix ta la boca, el peix recuperaba las suyas escamas, sobateba la coda, eslampaba de la man de l'ombre e s'eslizaba dica'l río.

E ye asinas como l'ombre que mató a l'anziano que cazaba paixaros e pescaba peixes morió de fambre.