El choben de grasa de ballena
Ñ'abeba una bez una choben misacha inuita, que ye como de berdat se dizen los esquimals, que'l suyo amigo se ba afogar n'el mar. Le ba fer muito duelo, y denguno no podeba aconortar-la, ella només queriba a'l que s'eba afogau, no queriba a dengún atro zagal.
El queriba tanto que ba dezidir de fer-ne un atro igual: ba pillar un troz de grasa de ballena y le ba dar la forma de'l suyo amigo.
Ba fer una escultura tan perfecta que pareixeba de berdat.
—¡Abraza-me! —le ba dir la figura de grasa de ballena.
Y la ternura de l'abrazo le ba dar bida.
Y se'n ban ir los dos a bibir enta una cabana chunto a'l mar, astí, en Groenlandia.
Cuan el suyo nobio beniba estransiu de pescar, le diba:
—¡Abraza-me fuerte!
Y l'abrazo de la suya amiga el refeba.
Un día que estaba cazán focas se ba trobar mal: el sol el derritiba. Estaba duro sudar, y cada bez iba fen-se més chicot.
Cuan ba pllegar en la cabana no eba més que un montonet de grasa de ballena. La suya amiga no'l ba poder abrazar.
La zagala se ba meter prou triste.
Pero ba pillar un atro buen troz de grasa de ballena y el ba modelar dan-le la farcha de'l suyo amigo afogau. Y cuan estaba acabán la suya obra, la figura le ba dir:
—¡Abraza-me fuerte!
Testo: Koldo Izagirre
Traduccion: Dabi Lahiguera
Voz: Dabi Lahiguera
