• Inizio
• Cuentos

Chuanet l'onso en a espelunga misteriosa

Chuanet yera solo en o castiello albandonau. Os suyos amigos, o picador y o molinero, se'n yeran ius de cazera.

Yera solo, pero teneba en a man a suya gayata de fierro, que pesaba zien quintals.

I Plegó o mendigo matón, o mesmo que eba benziu a o picador y a o molinero.

—¿Estiés tu? —le preguntó Chuanet.

Y o mendigo, sin responder, le querió atochar. Allora Chuanet pilló a suya gayata de zien quintals y le dió una atochazina.

Lo cruixó en cuatro trozos y los arrulló por a finestra.

Cuan i plegoron os suyos amigos a chenta yera sobre a mesa.

O picador y o molinero no dizioron cosa.

—Miraz-tos por a finestra —les dizió Chuanet.

Y beyoron que l'ombre terrible que les eba calau as dolors en o cuerpo yera en cuatro pedazos.

—Continemos entadebán —les dizió Chuanet—, encara no emos trobau o miedo.

Y marchín-marchán plegoron en una espelunga.

—Beigamos que i ha en dentro.

Chuanet fazió un zesto retorzendo bels árbols, y con bellas lianas fazió una baga nezesaria ta baixar o zesto.

Chuanet l'onso se posó en o zesto con a suya gayata de zien quintals.

O picador y o molinero s'encargoron d'agafar a baga ta ir baixando a Chuanet y a suya gayata.

Cuan plegó t'o fondo d'a simera, Chuanet beyó una muller.

—Soi a cusiradora d'as treze puertas —le dizió a muller.

Chuanet escatumbó as treze puertas con a suya gayata.

Y dezaga a zaguera beyó a dos repulidas mesachas.

—¿Qué fez astí?

—¿Somos as fillas d'o rei d'Ongaria?

Las eban raptadas, y lebaban güeito añadas en a espelunga.

Una d'as mesachas teneba una pilota d'oro, y as dos teneban siet bestius.

Talloron siet pedazos d'os suyos bestius y le'n dioron de presén a Chuanet.

Chuanet metió a una d'as chirmanas en o zesto, y estiró d'a cuerda ta que os suyos amigos la puyasen.

Cuan beyoron ixa mesacha tan pulida, o picador y o molinero se peleyoron por ella. Pero Chuanet estiró de nuebo d'a baga, y puyoron a la segunda mesacha. Allora o picador y o molinero fazioron as pazes.

—¿Tenez más chirmanas astí baixo? —les preguntoron a las mozetas.

—No, abaixo no queda so que Chuanet l'onso.

Y alabez os amigos de Chuanet chitoron a baga t'o fondo y se'n fueron ta casa d'o rei d'Ongaria con as dos mesachas.