Castletown

Pako Aristi

poesia

Erein, 1996

ERMITA

Castletowneko bidetik urrun,

lehorrean ondo mendialdera sartuta,

Kizkitzako ermita dago,

eta absidetik zintzilik itsasuntzi bat.

Inork ez daki nork eta zergatik

jarri zuen hura han.

Alferrik imajinatuko dituzu

hondoratze larrian etsipenak

isurarazitako promesak,

itsasoak semeak gal ez zitzan

etsi-etsian eskainitako

otoitz opariz bermatuak,

edota elbarri itsasminak

uhinen indar duina sentitzearren

izandako burutazioak.

Alferrik imajinatuko duzu ezer.

Festa egunean ere,

nahiz eta kaltzetako kafea egin,

pattarra muturretik edan,

eta soinu musikak

iufi eroekin haizea lainezatu,

ermita inguratzen duten pagoek

sekretua gordetzeko promesari

eusten diote.