La mair de l'umanitat
Açò qu'ei lo conte deu pòble mossi, fondator de Ouagadougou, la capitala de Burkina Faso. La lenga deus Mossi qu'ei lo moré, e en moré, Burkina Faso qu'ei lo país deus òmis libres.
Quauque còp, Uendé qu'èra l'ajòu mei sapient deus mossi.
Tres òmis mossi que's presentèn davant Uendé.
— Que voi un chivau — ce'u demandè lo purmèr.
— Que voi dus cans caçaires — ce'u demandè lo segond.
— Que voi ua hemna — ce'u demandè lo tresau.
E Uendé que'us balhè çò qui demandavan.
Los tres òmis mossi que se'n tornèn tau vilatge encantats.
Quan passèn peu bòsc, que hasó ua periclada terribla.
Que's hiquèn a l'acès, com podón.
Non deishava pas de plàver.
Qu'avèn hami.
La hemna qu'aluquè lo huec e que hasó lo repaish entà tots.
Los òmis mossi qui avèn lo chivau e los cans caçaires que tornèn auprès de Uendé.
— Gran Uendé, nosautes tanben, que volem ua hemna!
E lo vielh sapient que cambiè lo chivau e los cans en hemnas.
Los dus òmis mossi que se'n tornèn tau vilatge encantats, dab las lors hemnas.
La hemna qui èra gessida deu chivau que minjava hèra.
La hemna qui èra gessida deus cans qu'èra maishanta com l'arronha.
Mes, la purmèra hemna, la qui èra gessida de l'amor deu tresau mossi, qu'èra charmanta e doça : qu'ei la mair de l'umanitat.
Tèste : Koldo Izagirre
Trabucada : Institut Occitan (Pòle Lenga & Societat)
Votz : David Bordes
