Os piez perdius
An que agora ye Turquía i ha un puesto dito Karatepe, que existiba ya en o sieglo güeiteno d'a nuestra era.
T'a part d'alabez os ombres de Karatepe iban mal calzaus, porque eban de petenar entre rochas y carrerons de montaña y o material d'as suyas sandalias yera de mala calidat.
Bel día apareixió un zapatero en Karatepe.
Iba calzau eleganmén, y en o suyo carro trayeba cuero d'asabela calidat.
Os ombres de Karatepe chitoron as suyas sandalias t'a chera y l'ordinoron que les fese calzero nuebo ta toz.
Mientres o zapatero paraba o suyo taller, os ombres se posoron a la mosquera minchando olibas.
Y o zentro d'ixe zerclo yera una parbada de piez puercos y descalzos.
—¡Guardaz, emos mezclau os nuestros piez! —dizió un ombre.
—¿Cuál ye o mío piet dreito? —dizió un atro.
—¿Y o mío cucho? —dizió o terzero.
Denguno sabeba án teneba os piez, toz yeran iguals, puercos y espullaus, y yera imposible de distinguir-los.
—Allora gritoron a o zapatero.
—Zapatero, aduya-nos: no podemos trobar os piez nuestros, son toz mezclaus.
O zapatero dixó o cuero y os suyos trastes de tallar y cusir, y prenió una bara d'abellanera que lebaba ta arriar a la suya mula.
—No sabemos cuálos son os piez de cadaguno.
O zapatero se metió a foter berduscazos a os piez con a bara d'abellanera.
—¡Ai!
—¡Ai!,¡Ai!
—¡Ai,ai,ai!
Cada begada que mallaba un piet, o suyo propietario se debantaba tot endolorau, y saliba correndo.
Y asinas ye como os ombres de Karatepe recuperoron os suyos piez.
Testo: Koldo Izagirre
Traduccion: Dabi Lahiguera
Voz: Dabi Lahiguera
