A ignoranzia de Confuzio
Confuzio yera un filosofo que bibiba en a China d'a dinastía Zhou, fa bels dos mil zincozientos años. Se deziba que yera o más sabio d'o mundo conoixiu , y toz lo respetaban.
Zierto día que iba t'a fuen a por augua, bio una parella choben que pleitiaba calorada.
Confuzio s'aturó a alufrar-los.
—O sol ye más zerca de nusotros cuando sale y más leixos de meyodiada -deziba o mozet.
—No —deziba a mozeta—, ye más leixos cuando sale y más zerca de meyodiada.
O mozet no yera d'acuerdo, y dizió:
—Cuando sale, tien a grandaria d'una rueda gran. Y parixe un plato. Ixo se debe a que cuando ye zerca se bei más gran, y cuando ye leixos se bei más chiquet.
Pero a mozeta teneba un atro argumento:
—Cuando sale agún ye frío, pero a meyodiada nos calienta. Ixo quiere dezir que cuando sale ye leixos, y de meyodiada ye zerca.
O mozet se quedó callau, pensatibo. Pensatibo como l'ombre que yera escuitando-los.
O mozet fotió un codazo a la mozeta. Ella tamién fazió cuenta que un anziano los escuitaba. Y os dos reconoixioron a o sabio.
—Di-nos, gran Confuzio —le preguntó o mozet—, ¿Quí de nusotros tien razón?
Y Confuzio confesó que no sabeba quí d'os dos teneba razón, porque o sol parixe, por a suya grandaria, más zerca cuando sale; pero, por a suya calor, más zerca de meyodiada.
Alora, a mozeta, carrañada, le dizió:
—¿Y tu yes o más sabio de China?
Testo: Koldo Izagirre
Traduccion: Dabi Lahiguera
Voz: Dabi Lahiguera
