• Inizio
• Cuentos

O congreso d'animals

Os animals se reunioron, porque o biello lión s'eba muerto y iba a estar sustituyiu.

Allora o chefe nuebo dizió:

—Toz os domingos reyalizaremos treballos ta amillorar a nuestra soziedat.

Os animals aplaudioron a o chefe, que yera un bubón biello, muito sabio.

Pero uno no aplaudió: yera o zapo, que chandro y egoísta, deziba:

—¡Sí! ¡Baga-le! ¡O domingo yo boi a nadar y a dormir!

Y plegó o domingo y toz marchoron a cumplir con a suya faina, pero o zapo, en a badina, seguiba dezindo:

—Ai matutans, yo no boi a treballar...L'augua ye fresca, y dormir en ella ye delizioso.

Asinas pasoron bels domingos, dica que o biello bubón reunió de nuebo a os animals en asambleya y les fabló asinas:

—Amigos, toz somos satisfeitos d'o deber cumpliu, pero en bi ha uno que no deseya bibir en soziedat, que no quiere aduyar a la resta, y que por tanto ha de ser feito fuera d'aquí.

Toz os animals se miroron entre ellos y charroron a escuchetes, pero o zapo se quedó sin tartir.

Allora o bubón continó:

—No quiero acusar-lo dreitamén, nomás diré que ye berde, tien os güellos saltons y bibe en l'augua.

Allora o zapo blincó freneticamén, chilando:

—¡Ixo, ixo, que abienten a o crocodilo!