7 Apez eta profetak ere

behaztopaka dabiltza

galdurik arnoak,

galdurik edariak;

edariarengatik behaztopaka

eta arnoan itoak:

ikuskariak dituztenean itsumandoka

eta jujamendua emaitean nahas-mahaska.

8 Goiti-bota dituztenez

okaztagarriak dira mahai guziak.

Nihun deus garbirik ez.

9 Eta hau diote nitaz:

«Noren eskolatzen ari da?

Nori ari da bere mezuen emaiten?

Doi-doia higuindurik

amaren bularra utzia duten

haurtxoeri?

10 Hunela ari da:

hizki-mizki, xuxu-muxu,

batean hau, bestean hura ».

11 Horra, bada: hizketa nahasiz,

hizkuntza arrotzez,

hitz eginen dio Jaunak herri huni.

12 Errana zioten:

«Huna hemen pausua,

utzazue akitua pausatzera,

huna lasaitasuna».

Bainan heiek kasurik ez egin.

13 Horrengatik,

Jaunaren hitza ezin-konprenituzkoa

izanen zaiote:

hizki-mizki, xuxu-muxu,

batean hau, bestean hura,

eta bidean erroz gora erori

eta hezurrak hautsiko dituzte,

zepoan harrapatuak

izanen dira.