Trapu zaharrak

Iban Izagirre

poesia

Erein, 2008

MILAKA TRASTE

Badira gure apaleko puru kaxetan

arrosarioak

estanpak

medailak

urdindutako metal pobre bedeinkatuak

Badira han biblia txikiak

aurrezki kutxako giltzazainak

belztutako karta-pilo espainolak

eta zaborretan amaituko duten

objektu baliogabekoen zerrenda amaigabe bat

Norbaitek alferrikakoak direla pentsatuko du

eta zakarretara bota arte hor iraungo dute

ahanzturaren izkina batean

Traste hauekin batera

ozta-ozta izanik ere

gure artean irauten duten istorio txikiak daude

sepiazko irudikapen bilakatzen diren

sukaldeetako kontakizun arruntak