Barrua huste aldera

Anastasio Esnaola

poesia

Arantzazu, 2006

BIDE BERRIETAN ZEHAR GALDUTA

Jakintza mailan aurkitu nahi,

Zenuen denen egia;

Eta teknikan jar duzu Jainko,

Hartan zelakotz argia.

Teknika horren pean, ordea,

Erori zaizu fedea.

Bide zaharra ilun zen; baina

Erraza ahal da berria?

Makinak eman ahal duena

Daukazu egi bakartzat.

Hortik kanpo den beste guztia

Hartu behar da okertzat.

Baina bizitzan gauza asko dira

Arras zailak makinentzat;

Hauek ez dute erantzun onik

Zuk dituzun galderentzat.

Izpiritua, hatsik gabeko

Gauzetan finka nahi da;

Konkretua da maitatzen dena;

Beste oroi ostikada.

Mendean izan behar zenuna,

Jauna duzula esanda,

Konpreni zazu nola zabiltzan,

Ematen duzun oinkada.

Kalkulu batzuk eginez geroz,

Erausiz korapiloak,

Munduko egi denen ardatza

Eskutan uste jakintzak.

Lan hoiek oro behar dira gaur,

Ontzat daduzka munduak.

Baina hoietaz kanpo badira

Problema sakon askoak.