1 Aldi baten buruan, haserrea eztitu zitzaion Asuerori; bainan gogoan zuen Baxtik egina eta haren kontra hartu erabakia. 2 Hunela mintzatu zitzaizkion orduan erregeari bere funtzionarioak:

–Bila ditzatela erregearentzat neskatxa gazteak, birjinak eta pollitak. 3 Izendazkizu erresumako eskualde guzietan mandatariak, neskatxa birjinak eta pollitak Susarat, erregearen haremerat ekar ditzaten; utz ditzatela emazte horien zaintzeko kargua duen Hegairen, erregearen irenaren ardurapean; harek emanen diozkate edergailuak. 4 Eta neskatxa horietan erregeari gustatuko zaiona izan bedi erregina, Baxtiren ordez.

Ongi iduritu zitzaion erregeari, eta hola egin zuen.

5 Bazen Susa hirian Mardokeo izeneko judu bat, Jair-en semea, eta Ximeiren biloba, Benjaminen leinuko Kixen ondokoa. 6 Babilongo errege Nabukodonosorrek erbesteratua zuen Jerusalemdik, Judako errege Jekoniasekin erbesteratu zituenekin batean. 7 Bere lehenkusi Hadasaren , erran nahi baita, Esterren aitaordea zen; Esterrek ez baitzuen gehiago aitarik, ez amarik. Neska lerdena zen gorputzez, eta biziki ederra. Aitamak hil zitzaizkiolarik, Mardokeok alabatzat hartua zuen.

8 Erregearen errana eta erabakia zabaldurik, anitz neskatxa bildu zuten Susa hirirat, eta Hegairen ardurapean ezarri. Ester ere jauregirat ereman zuten besteekin batean eta Hegairen, emazte-zainaren ardurapean ezarri. 9 Ester gustatu zitzaion, atsegina iduritu baitzitzaion; behar zituen edergailuak eta bizitzekoa eman ziozkan berehala, bai eta jauregikoen artean hautatu zazpi neskato. Haremeko gelarik hoberenerat ereman zuen bere neskatoekin. 10 Esterrek ez zuen jakiterat eman zoin herri eta zoin jatorritakoa zen, Mardokeok manatua baitzion ez erraiteko. 11 Mardokeo haremeko atari aitzinean ibili ohi zen egunoro, Ester osasunez nola zen eta nola zerabilaten jakin nahiz. 12 Hamabi hilabeteren buruan, emazteentzat manatua zen epea bete ondoan, nexkatxa bakotxari Asuero erregearen aitzinerat agertzeko aldia etortzen zitzaion. Edertzeko gantzuketak hunela egin ohi ziren: sei hilabetez mirra-olioz, eta ondoko seietan emazteek erabili ohi dituzten usain-gozoz eta bestez. 13 Neskatxa batek erregearen aitzinerat joan behar zuenean, apaintzeko eskatzen zuen guzia emaiten zitzaion, haremetik jauregirat berekin ereman zezan. 14 Ilunabarrean sartzen zen jauregirat, eta biharamun goizean beste harem batetarat joaiten, Xaaxgaz-en, erregearen emazte-zain zen irenaren ardurapean jartzera. Ez zen berriz erregearen aitzinerat agertuko, erregeak desiratzen eta deitzen ez bazuen.

15 Jin zitzaion Esterri, Mardokeok alabatzat hartua zuen bere osaba Abihailen alabari, erregearen aitzinerat agertzeko aldia. Emazte-zain zen Hegaik, erregearen irenak erran ziona baizik ez zuen eskatu Esterrek. Ikusten zuten guziak xoratzen zituen. 16 Asueroren erregealdiaren zazpigarren urteko hamargarren hilabetean, hots, Tebet hilabetean, ereman zuten Ester erregearen aitzinerat. 17 Erregeak Ester maitatu zuen beste emazte guziak baino gehiago; beste neskatxa guziek baino gehiago erregearen onginahia eta amodioa piztu zituen. Korona buruan ezarri zion eta erregina egin zuen Baxtiren ordez. 18 Gero, apairu handia eman zioten erregeak buruzagi eta funtzionarioeri, Esterren ohoretan. Zergak arindu zituen eskualdeetan, eta erregeari doakion nasaitasunez egin zituen emaitzak.

19 Neskatxak haremerat bigarren aldiz bildu zirenean , Mardokeo erregearen ate aitzinean jarririk zagon. 20 Esterrek ez zuen jakitera eman zoin herri eta zoin jatorritakoa zen; Mardokeok hala baitzion manatua eta Mardokeok errana egiten zuen, haren ardurapean zagonean bezala.

21 Behin, Mardokeo erregearen ate aitzinean jarririk zagola, Bigtan eta Terex, gelazain ziren erregearen bi laguntzaileak, Asuero erregea hiltzeko xedearekin zabiltzan, biziki haserre. 22 Mardokeok, horren berri ukan zuenean, Ester erreginari jakinarazi zion, eta Esterrek erregeari, Mardokeoren izenean. 23 Ikerketa eginik, egia zela ikusi zen. Urkatuak izan ziren biak, eta gertakari hori idatzia izan zen Erresumako Kronika Liburuan erregearen manuz.